Joavan naabswelto sa kaso
CEBU, Philippines - Human mahukmi ni Regional Trial Court (RTC) Judge Soliver Peras sa Branch 10 nga mabilanggo sa tibuok kinabuhi si Joavan Fernandez ang kontrobersiyal nga anak ni Talisay City councilor Socrates Fernandez giabswelto kini sa laing kaso nga direct assault nga gipasaka batok kaniya ni Police Superintendent George Ylanan.
Niadtong 2011, si Ylanan chief inspector pa ang ranggo dihang mipasaka sa nahisgutang kaso batok kang Joavan.
Sa desisyon ni Judge Pamela Baring-Uy, presiding judge sa Municipal Trial Court in Cities (MTCC) Branch 6, si Joavan dili guilty sa direct assault human nga ang prosekusyon napakyas sa pagpamatuod nga si Joavan nakahimo gyud sa nahisgutang kalapasan.
Ang kaso nagsumikad sa pasangil nga gibanggaan ni Joavan ang patrolcar nga gisakyan nila ni Ylanan, Inspector Jesus Arong, SPO1 Alfredo Petallar, PO3 Alber Maglite, PO3 Meberth Deo, PO2 Joseph Bugtai ug PO1 Allain Dignos.
Sumala pa nga wala magkatakdo ang mga pamahayag nilang Ylanan, Arong ug Bugtai bahin sa nahitabong insidente.
Si Joavan wala usab pahamtangi og civil liability sa pagbangga niya sa service vehicle tungod kay walay napresentar ang prosekusyon sa actual proof sa danyos sa sakyanan.
Ang maong insidente nahitabo niadtong Pebrero 6, 2011 sa ala una sa kaadlawon sa Dakbayan sa Sugbo dihang ilaha unta kining dakpon pinasikad sa warrant of arrest.
Ang maong pasangil ni Ylanan gihimakak ni Joavan ug matud sa abogado niining si Atty. George Bragat nga ang maong warrant of arrest sa kasong malicious mischief nga gidala ni Ylanan ug sa iyang mga kauban nga giisyu sa Municipal Trial Court in Cities sa Dakbayan sa Talisay dili na epektibo kay nakapiyansa na man kining daan sa maong kaso ug aduna nay release order nga giisyu ni Judge Mario Manayon. (BANAT NEWS)
- Latest
