Kapin P1M shabu

CEBU, Philippines - Kapin usa ka milyon ka pesos nga shabu nasakmit sa duha ka buwag nga operasyon sa kapolisan dinhi sa Sugbo.

Niadtong adlaw nga Martes gironda sa mga sakop sa Criminal Investigation and Detection Group (CIDG)-7 ang panimalay sa usa ka gipasanginlang notadong drug pusher sa Villagonzalo II, Brgy. Tejero Dakbayan sa Sugbo.

Nasikop sila si Roger Tagayong, 36, ug Junmel Alivio, 25, pulos nagpuyo sa nahisgutang dapit.

Ang operasyon gipangulohan ni Superintendent Fermin Armendarez III kauban ang mga  sakop sa Regional Public Safety Battalion (RPSB) ug may koordinasyon sa Philippine Drugs Enforcement Agency (PDEA)-7.

Nakuha sa maong operasyon ang (1) rectangular-size transparent plastic nga adunay shabu; (6) medium size transparent nga adunay shabu; (3) rectangular size transparent plastic nga adunay shabu; (1) rectangular size nga adunay shabu; (12) lighter (1) bamboo stick; (1) bundle medium size empty plastic; (1) improvise burner nga gituohang gamiton aron pag-repack sa shabu; drug paraphernalia ug P900 nga kwarta nga gituohan nga halin sa shabu.

Samtang nasakmit sa kapolisan ang mokabat sa P477,000 nga kantidad sa gidudahang shabu gikan sa gipasanginlang drug pusher  sa Brgy. Pulog, Lungsod sa Consolacion sa miaging kaadlawon.

Si Police Officer 1 Raymond Lleve sa Consolacion Police Station miila sa nadakpan nga mao si Randy Godinez Gonzaga, 41.

Pito ka medium size pakete ug 11 ka gagmay nga pakete nga ang tanan mokabat gayod sa 40.47 gramong shabu ug napulo ka tinfoils ang nasakmit sa kapolisan.

Nakuha usab og balik sa kapolisan ang P200 nga mark money gikan sa maong dinakpan ug salapi nga P2,300 nga gituohang halin sa ilegal nga drugas.  Matud pa ni Lleve  si Gonzaga  giila nga level 2 drug pusher  sa maong dapit.

Ang mga  dinakpan kasamtangan karong gitanggong sulod sa ilang detention cells ug pasakaan og kasong kalapasan sa Republic Act 9165 o Comprehensive Dangerous Drug Act. (BANAT NEWS)