CICC dayonon og palit sa Mandaue

CEBU, Philippines – Nabuhi karon og balik ang tinguha nga pagpalit sa kagamhanan sa Dakbayan sa Mandaue sa Cebu International Convention Center (CICC) aron magamit nga luna sa pagladlad sa lokal nga mga produkto.

Matud ni Vice Mayor-elect Pontico Carlo Fortuna nga sa higayon nga mahingpit ang pagpanag-iya sa maong edipisyo sa lokal nga kagamhanan maoy ilang hatagan og lugar ang Mandaue Chamber of Commerce and Industry (MCCI) sa pagpasiugda og trade expo.

Si Fortuna nagkanayon nga nakahimo na sila og pasiuna nga pagtuki labot niini kauban sila si outgoing Mayor Jonas Cortes ug Mayor-elect Gabriel Luis Quisumbing ug Gobernador Hilario Davide III.

Nagtuo si Fortuna nga ubos sa gahin nga P2.7 bilyones karong tuiga, mapalit na ang maong edipisyo nga wala na kinahanglana nga mangutang pa og salapi ang kagamhanan sa dakbayan.

Pasiunang nasabutan ang kantidad nga P200 milyones sa pagpalit sa CICC.

Natukod ang CICC panahon ni kanhi gobernador ug karon Kongresista Gwendolyn Garcia sa kantidad nga P800 milyones.

Kini nahimong venue sa 12th Association of Southeast Asian Nations (Asean) Summit niadtong tuig 2007 nga gipahigayon sa Sugbo. - /GMR) (BANAT NEWS)