Eleksiyon sa opon ipaimbestigar

CEBU, Philippines – Giawhag sa mga kaalyado ni incoming President Rodrigo Duterte sa Dakbayan sa Lapu-Lapu ang Commission on Elections ug Senado nga ilakip sa imbestigasyon ang resulta sa eleksiyon sa dakbayan.

Ang Team Kusgano nga gipangulohan ni mayoralty candidate Rolando Patalinjug ug congressional candidate Celedonio “Celsi” Sitoy nipadala sa ilang petisyon kagahapon kuyog sa pirma sa mokabat 30 mil ka mga botante.

Atol sa press conference sa panimalay ni Patalinjug kagahapon, si Team Kusgano founder, Cordova Mayor Adelino Sitoy, nipakita sa duha ka itom nga kahon alang sa mga opisyal nga balota nga giduwaan sa mga bata sa Barangay Marigondon.

Kini nakapatumaw sa pagduda nga may maniobra sa eleksiyon niadtong Mayo 9.

Usa sa nakapaduda sa kampo ni Patalinjug ang wala silay nadag-an nga barangay ug mismo sila pilde sa ilang tagsatagsa ka barangay.

Matud ni Mayor Sitoy nga bisan asa nga lugar, normal nga masulod bisan ang usa ka independente nga kandidato sa pagka-konsehal sa iyang barangay apan wala kini nahitabo sa Dakbayan sa Lapu-Lapu.

Si Celsi sa iyang bahin nipadayag sa dakung kasagmuyo sa resulta sa eleksiyon sanglit karon pa nahitabo nga napilde siya sa eleksiyon sukad 1971.

“Ako modawat sa resulta apan di ko moangkon sa kapildehan,” matud ni Celsi kinsa dugay nga nahimong mayor sa Cordova.

Usa ka semana sa wala pa ang adlaw sa eleksiyon, matud ni Celsi nga diha nay nakigpustahanay nga modaug ang kampo ni Mayor Paz Radaza nga 15-0.

Mao usab kini ang nadungog ni Rizalino Ompad sa Barangay Talima.

Ang kandidato sa pagka-konsehal, Carlito “Tantan” Sabalones, nibutyag nga Abril 28 adunay nanawag ug nakigkita kaniya ug nangayo og P5 milyones aron lang masukip siya sa padag-on.

Daku usab ang katingala ni Sabalones nga lima ra ka pangan sa konsehal nga iyang gibotaran ang nigawas sa resibo ug mismo iyang pangan ang wala nalakip sa 12.

Usa ka botante nga si Kevin Telcio, 21-anyos, taga Barangay Basak, ang nibutyag usab nga ang iyang gibotaran si Patalinjug apan ang nigawas sa resibo pangan ni Radaza.

Buot ni Mayor Sitoy nga ilang maatubang si Duterte aron mapadangat ang ilang reklamo ilabi na nga ang ilang partido ang giamong-amongan sa Dakbayan sa Lapu-Lapu.

Nanghinaut usab si Celsi nga paminawon ang ilang petisyon. - /GMR) (BANAT NEWS)