Curfew sa minors gihangop sa PCWC

CEBU, Philippines – Gihangop ni Heda Largo ang executive officer sa Provincial Council for the Welfare of Children (PCWC) ang pagsuporta sa provincial board sa sugyot ni Presumptive President Rodrigo Duterte nga adunay curfew sa mga menor de edad tibuok nasud.

Nakita ni Largo nga maayo ang maong tinguha tungod kay makaayo kini sa kabataan.

Matud ni Largo nga makatabang usab kini sa PCWC sanglit matibhangan niini ang kahigayonan nga maabusohan ang kabataan.

“The challenge is there, but dili conclusive na gamay kay there are different types of abuse,” matud ni Largo.

Matud niya nga aduna usab pang-abuso nga mahitabo sa adlawan samtang sa gabii sagad mahitabo ang “sexual abuse.”

Si Largo nagkanayon mas labing maayo ang pag-monitor ug kooperasyon sa mga ginikanan.

Kagahapon ang hunta probinsyal mipasar kini og resolusyon nga nagsuporta kang Duterte nga adunay curfew sa mga menor de edad gikan sa alas- 10 sa gabii ngadto na sa alas-6 sa buntag.

Si Bise Gobernador Agnes Magpale, kinsa chairman sa PCWC, mipadayag og suporta niini samtang si gobernador Hilario Davide III, nagkanayon nga usa kini sa mga pamaagi aron nga madisiplina ang mga kabatan-onan.

Sa laing bahin, ang mga eskuylahan duolon sa PCWC karon pagsugod sa klase aron ipaabot ang kabahin sa kampanya kontra cyber pornography.

Gawas niini mopahigayon usab sila og operasyon batok sa mga “piso net” tungod kay ang mga menor de edad maoy sagad nga mogamit niini kay piso ra unya maka-access na sila sa mga pornographic websites.

Si Magpale mibutyag nga usa sa ilang mga commissioners ang nakasaksi gyud og usa ka menor de edad nga nag-atubang sa piso net nagtan-aw og mga law-ay nga hulagway sa cyber porn websites ug nagduwa-duwa kini sa iyang kinatawo.

Matud ni Magpale nga ang maong insidente nahitabo diha sa usa sa mga siyudad sa habagatang bahin sa Sugbo.

Ang maong commissioner na-shock sa iyang nakita ug gipangita niini ang tag-iya sa piso net apan walay miangkon.

Walay dautan sa bag-ong teknolohiya apan kinahanglan dunay limitasyon usab sa paggamit niini matud pa niya.  - /EIM