11 libudsuroy naluwas
CEBU, Philippines – Mokabat ngadto sa onse ka mga batang libudsuroy ang giluwas sa mga sakop sa Mabolo Police Station ug mga opisyal sa Brgy. Mabolo gikan sa ilawom sa Mabolo Bridge.
Matud ni Chief Inspector Wildemar Tiu hepe sa Mabolo Police Station nga nakigtambayayong sila sa mga opisyal sa Brgy. Mabolo ug nahibaw-an nga adunay mga libudsuroy nga nagpuyo sa ilawom sa taytayan tabok-karsada sa ilang buhatan. Human nakuha ang maong mga bata gibutangan dayon kini og mga barbed wires aron di na sila mamalik didto. Si Tiu nagkanayon nga kasagaran sa mga batang ilang na-rescue gibiyaan sa mga ginikanan.
Nabantayan usab ni Tiu nga adunay mga kwarto-kwarto nga gihimo sa ilawom ug ila usab nahibaw-an nga sa edad nga 10 anyos ang pipila kanila makighilawas na.Matud ni Mabolo Brgy. Kapitan Reynaldo Ompoc nga sagad sa mga bata nga namuyo sa ilawom sa tulay taga Brgy. Pasil ug Duljo- Fatima.
Nakuha sa ilawom ang mga hinagiban ug rugby. Ang 11 ka bata gilangkoban og walo ka mga lalaki ug tulo ka babaye. - /EIM
- Latest