Curfew sa mga menor de edad aprub sa Hunta

CEBU, Philippines - Ang Hunta Probinsyal mipadayag sa ilang suporta sa resolusyon ni Provincial Board Member Arleigh Sitoy nga pagpatuman og curfew alang sa mga menor de edad atol sa ilang sesyon kagahapon.

Naumol ang maong resolusyon sanglit na-obserbaran karon nga ang mga kabataan sagad nga makit-an nga maglaroy-laroy sa kadalanan pasado alas 10 na sa gabii.

Dili lang makit-an nga maglaroy-laroy kundi aduna'y uban nga makit-an usab nga nag-inom og ilimnong makahubog uban sa barkada.

Sumala sa resolusyon nga mas maayong mangatulog og sayo ang mga kabataan aron  sila makatungha og sayo sa eskuylahan ug aduna pay higayon nga manikay-sikay sa balay.

Ang maong resolusyon matud pang Sitoy, pahaom usab sa tinguha ni presumptive president Rodrigo Duterte nga mopatuman og curfew alang sa mga menor de edad sa tibuok nasud aron sila malikay sa krimen, drugas ug dautan.

Bisan si Bise Gobernador Agnes Magpale uyon sa pagpatuman og curfew.

Sa plano ni Duterte, ang mga ginikanan sa mga masakpang menor de edad maoy silotan tungod sa pagpasagad nila sa ilang mga anak. (BANAT NEWS)