Granada, P1M shabu gibilin sa motor

CEBU, Philippines - Usa ka granada ug kapin usa ka milyon ka pesos nga kantidad sa gituohang shabu ang narekober sa kapulisan gikan sa usa ka gi-abandonar nga motorsiklo, atubangan sa usa ka tunghaan sa kolehiyo diha sa Brgy. 8  sa Lungsod sa Tuburan.

Matud pa sa hepe sa Tuburan Police, Sr. Insp. Leo Logroño nga nahinabi sa Banat News nga Huwebes sa hapon nakadawat sila og impormasyon nga dunay motorsiklo nga  gibilin sa maong dapit ug gikabalak-ang aduna kini bomba.

Ang mga sakop sa Bomb Squad ug mga sakop sa Provincial Intelligence Branch (PIB) sa Cebu Provincial Police Office daling misusi sa motor.

Ang team leader sa PIB nga si SPO1 Reynante Solante nga nahinabi sa Banat News nagkanayon nga wala sila nakakita nga bomba.

Dunay sling bag nga gibutang sa manobela ug sa ilang pagtan-aw usa ka granada nga “Apple type” ang nakuha ingon man ang pinaketeng shabu nga mikantidad og P1, 180,000.

Gawas sa shabu ug granada, nakuha usab sa mga polis ang usa ka identification card sa media DYTX ug dunay pangalan nga Wilfredo Diamante.

Apan ang magulang ni Wilfredo nga si Tuburan Mayor Aljun Diamante nga nahinabi sa Banat News miingon nga usa na usab kini ka bag-ong taktika sa iyang kaatbang nga si Daphne Lagon.

Si Mayor Diamante mitug-an nga kapitan sa barangay Cogon ang iyang manghod ug desperado na kaayo ang iyang kaatbang karong panahona kay hasta ang iyang igsuon ang giapil na usab sa ilang away sa politika.

Si Daphne Lagon nga nahinabi sa Banat News sa iyang bahin miingon nga wala silay kalibutan sa maong hitabo kay busy sila sa ilang headquarters ug sa pag follow-up sa ilang mga sakyanan nga gipangdakop sa         mga traffic enforcer. (BANAT NEWS)