Hepe sa Toledo City Police parelibohan sa Comelec-7

CEBU, Philippines - Ang director sa Commission on Elections-7  mirekomendar karon sa pagparelibo sa hepe sa Toledo Police Station kalabot sa nahitabong isyu duha ka semana na ang nakalabay diha sa buhatan sa Comelec-Toledo City.

Matud pa ni Jose Nick Mendros, director sa Comelec-7 miingon nga wala mohatag og assistance si Supt. Samuel Mina kang Atty. Michael Angelo Sarno, kinsa temporaryo nga gibalhin sa South District sa Dakbayan sa Sugbo ning umaabot nga bugnong lugaynon.

Si Mendros nagkanayon nga base sa pamahayag ni Sarno, iyang nasabot nga wala moayuda si Mina sa pagpangayo niini og tabang dihang gitanggong si Sarno tungod sa pagduda nga aduna kini dautang gibuhat diha sa kaugalingon niining opisina.

Niadtong tungora, padung unta si Sarno sa Calatrava sa Negros Island Region ug may gihapit nga mga dokumento alang sa  BEI refresher training niadtong April 19, 2016.

Apan adunay concerned citizen nga daling misumbong sa kapolisan ug mikwestyon kun unsay gibuhat ni Sarno tungang gabii sa maong buhatan nga sa ilang pagsabot gibalhin naman kini og destino.

Una nang mipasabot si Mendros nga si Sarno pa gihapon ang Comelec officer sa Toledo City ug ang pagbalhin niini sa laing dapit temporaryo lamang para niining umaabot nga May 9 elections.

Si Mendros magpaabot pa kung unsay rekomendasyon sa Provincial Joint Security Control Center may labot sa iyang laraw sa pagparelibo sa maong hepe,

Gitug-an ni Mendros, apil sa trabaho sa deputation sa kapolisan ubos sa Comelec mao ang paghatag og seguridad sa mga sakop sa maong buhatan panahon sa piniliay.

Si Sarno sa iyang bahin nipadayag nga wala pa siya masayod  sa tinguha sa ilang direktor bahin kang Mina.

Si Mina nga nahinabi sa Banat News, nitug-an nga dili tinuod nga wala siya mohatag og assistance kang Sarno kay sa iyang nahibaw-an dili na kini ang election officer sa siyudad.

Sumala pa niya, bisan ang bag-ong gidestinong election officer wala masayod kung nag-unsa sa maong buhatan si Sarno.

“ Wala gyud ko masayod sa ilang internal nga kasabutan, ako nilihok lang kay aduna may reklamo,” pasabot pa ni Mina.

Giklaro usab niyang atol sa maong insidente, anaa ra gayud siya sa tunga ug gani iyang giimbitar si Sarno sa buhatan niini aron makontrolar ang kainit sa mga tawo nga gustong magpakisayod kung nganong naa kini sa maong buhatan.

Gipadayag ni Mina, iya gayud gitawgan si Atty. Gallardo Escobar aron maoy mopakalma sa tanan ug didto natigayon ra ang tanan ug nakalakaw ra usab si Sarno. (BANAT NEWS)