Pekeng polis nakigpinusilay, kauban naangol
CEBU, Philippines - Samdan ang usa ka lalaki human napusilan samtang nakaeskapo ang kauban niini nga nagpakaaron- ingnon nga usa ka pulis human giingon nakigpinusilay sa kapulisan diha sa Brgy. Matab-ang sa Dakbayan sa Toledo. Giila ang nasamdan nga si Dominador Barcuma ,23, taga Brgy. Arpili sa Lungsod sa Balamban.
Samtang usa ka Jessie Chris Recla ang giingong nagpatuo nga sakop sa kapulisan ang padayon karong gipangita human kini nakaikyas.
Nasayran nga si Recla ang gipangita sa kapulisan tungod kay gituohang nag- atubang kini og kasong murder. Una niini, nakadawat og impormasyon ang kapulisan kalabot sa nahimutangan ni Recla hinungdan nga ila kining giadto aron i-serve ang warrant of arrest niini.
Naabtan nila si Recla nga nagsakay og motorsiklo nga gimaneho ni Barcuma, dihang ilang giduol, gikatahong kalit nga mibunot ang duha sa ilang gitangkil nga armas ug gipamusil ang mga polis.
Tungod niini nibawos usab sa pagpamusil ang kapulisan ug naigo si Barcuma sa kilid nga bahin sa iyang lawas, samtang si Recla ang nakaeskapo. Nakuha sa kapulisan ang motorsiklo nga gigamit sa mga suspek, mga bala ug pitaka nga adunay peke nga Identification Card sa Philippine National Police (PNP) diin giingong nakabutang ang pangalan ni Recla. (BANAT NEWS)
- Latest