Davide ug Magpale mibisita sa provincial jail
CEBU, Philippines - Gibisitahan nila ni Gobernador Hilario Davide III ug Bise Gobernador Agnes Magpale ang mga piniriso sa Cebu Provincial Detention and Rehabilitation Center (CPDRC).
Ang mga piniriso dili makabotar sa mga lokal nga kandidato apan sumala ni Davide nga pinaagi sa mga binilanggo mahimong madasig nila ang ilang tagsa-tagsa ka pamilya aron anha moboto kanila ug sa ubang kandidato sa Partido Liberal, ilabi na ni Mar Roxas sa pagka presidente. Matud ni Davide nga boluntaryong mipadayag og pagsuporta kanila ni Magpale ang mga binilanggo hinungdan nga ila kining gibisitahan sa tagsa-tagsa nila ka mga selda.
Lima ka piniriso sa CPDRC ang mihatag og testimonials ug suporta ngadto sa gobernador ug bise gobernador dayon ang mga dancing inmates mihimo’g presentasyon nga sayaw ngadto sa ilang mga bisita.
Gisaaran ni Davide ang mga piniriso nga kun mapili siya pagbalik, iyang ipadayon ang pagpalapad sa CPDRC aron dili na maghuot ang mga binilanggo.
Matud ni Davide nga gihimo na karon sa engineerings office ang desinyo sa bag-ong building sa cpdrc nga anha ihimutang sa luyo nga bahin sa provincial jail.
Si jail warden Romeo Manansala miingon nga ilang bana-bana nga moabot sa 1,500 ka piniriso ang makaukopar sa pagatukoron nga bilanggoan.
Pagkakaron, miabot na og 2,903 ang mga piniriso nga natanggong sa CPDRC, nga halos doble sa iyang kapasidad nga 1,600. Si Davide naglaom nga nanghinaot usab nga atimanon na sa Public Attorney's Office ang mga kaso niadtong mga binilanggo nga walay klaro nga abogado.
Adunay mga 1,200 ka binilanggo sa CPDRC nga gitugotang makabotar karong Lunes. (BANAT NEWS)
- Latest
