Mga mag-uuma nga biktima sa El Niño gitabangan

CEBU, Philippines - Mga mag-uuma sa bukirang barangay sa dakbayan sa Sugbo gitabangan sa City Hall pinaagi sa Cebu City Agriculture Office.

Ang mga mag-uuma gipanghatagan og mga ekipo sa panguma, mga abuno, tangke sa tubig ug uban pa.

Si City Agriculturist Joelito Baclayon miingon nga ang tumong sa pagpanghatag og mga ekipo sa mga mag-uuma nagumikan kay nakasinati sila og epekto sa grabeng huwaw.

Mga mag-uuma gikan sa 28 ka bukirang barangay sa dakbayan mitambong sa pagpanghatag sa maong mga hinabang. Matud ni Baclayon nga ang mga apektadong mag-uuma gihatagan usab nila og mga food packs ug canned goods.

Gipasabot ni Baclayon nga gamay ra ang 917 ka mag-uuma nga nakasinati og epekto sa huwaw kay sa 28 ka bukirang barangay adunay kapin sa 8,000 ka mag-uuma.

Samtang ang mga apektadong mag-uuma sa 28 ka bukirang barangay gipanghatagan usab og 180 ka rolyo sa plastic hose kaniadtong duha ka semana na ang milabay.

Matud ni Baclayon nga ang abuno nga gihatag magamit alang sa lainlaing matang sa tanom. Samtang sa Kapitolyo, nikabat ngadto sa P5.5 milyones ang kantidad sa kadaot sa mga livestock ug poultry sa 18 ka lungsod sa probinsiya nga naapektohan sa El Niño sukad niadtong Abril 28, base sa report sa Provincial Veterinary Office.

Ang mga lungsod mao ang Sibonga, Argao, Dalaguete, Alcoy, Oslob, Pinamungajan, Asturias, Tabuelan, Madridejos, Medellin, Tabogon, San Francisco, Poro, Tudela, Pilar, Compostela, Ginatilan ug Alegria.

Sa lungsod sa Sibonga mikabat sa P248 mil ang danyos; P17 mil sa Argao; P246 mil sa Dalaguete; P49 mil sa Alcoy; P30 mil sa Oslob; P1.2 milyones sa Pinamungajan; P168 mil sa Asturias; P312 mil sa Tabuelan; P84 mil sa Madridejos; P437 mil sa Medellin; P683 mil sa Tabogon; P1.1 milyones sa San Francisco; P72 mil sa Poro; P25 mil sa Tudela; P150 mil sa Pilar; P45 mil sa Compostela; P4,500 sa Ginatilan ug P672 mil sa Alegria. Ang PVO padayon pa nga nanghipos og mga datos sa ubang kalungsuran nga naapektohan sa El Niño. (BANAT NEWS)