Kandidato gihapon bisan napriso
CEBU, Philippines - Pabilin gihapon nga kandidato ang usa ka babaye nga nidagan pagkakonsehal sa Siyudad sa Talisay bisan pa man og siya gidakop ug gitanggong sa kapulisan gumikan sa kasong large scale illegal recruitment.
Kini maoy giklaro ni Atty. Charisse Faith Sojor, election officer sa dakbayan kay matud pa niya wala pa man makombikto si Ma. Ludina "Dina" Ceniza sa kaso nga giatubang.
Si Ceniza, 51, kasamtangang nagpuyo sa unit 5 Oprah Village, Barangay Kalunasan, Siyudad sa Sugbo gisikop pinasikad sa warrant of arrest nga giluwatan ni Judge Raphael Yrastorza Sr. sa Regional Trial Court (RTC) Branch 14 sa Dakbayan sa Sugbo nga penetsahan niadto pang Mayo 29 sa miaging tuig ug walay pyansa nga gitagana.
Ang mga sakop sa Regional Special Operations Group (RSOG) sa Police Regional Office (PRO-7) nidakop ni Ceniza human sa ilang pulong-pulong sa Sitio Isla Verde, San Isidro, dakbayan sa Talisay niadtong Lunes sa gabii.
Si Sojor nipasabot nga kun modaug man gani si Ceniza karong piniliay ila gihapon kining iproklamar ug magdepende ra pud unya kun aduna bay mokwestyon didto sa korte. Apan dili siya makahimo sa iyang trabaho isip konsehal sama sa pagtambong og sesyon sanglit naa man siya sa prisuhan.
Iyang gidugang nga dili na mahimong hulipan si Ceniza tungod kay wala man kini nalatid sa balaud nga dili na mahimong mokandidato ang usa ka tawo kun kini masikop.
Mahulipan lang ang usa ka kandidato kun kini mamatay o ba kaha dili na makahimo sa iyang trabaho apan kinahanglan nga pareha usab og apelyedo ang mohulip.
Si Ceniza nilansar pagkakonsehal ubos sa kampo ni Mayor Johny De Los Reyes. Ang mayor miingon nga dili makaapektar kanila ang pagkasikop ni Ceniza tungod kay personal kini niyang problema. (BANAT NEWS)
- Latest
