CTMS Traffic Enforcer nga nag-viral gidayeg

CEBU, Philippines - Gidayeg ug gihatagan og pasidungog sa kagamhanan sa Siyudad sa Lapu-Lapu ang 51-anyos nga traffic enforcer nga nag-viral sa social media tungod sa pagtabang niini sa nasaag nga motorista nga nakalapas sa lagda sa trapiko.

 Si Leopoldo Casul, sakop sa City Traffic Management Systems nisikat sa social media human gi-post sa usa ka grupo sa mga nangasaag nga mga turista sa miaging Mayo 1 ang iyang maayong taras sa panerbisyo.

Si Mayor Paz Radaza personal nga midayeg ni Casul tungod kay nakapanindot sa imahe sa siyudad ug sa mga Oponganon ang gihimo niini. Nanghinaut kini nga duna pay laing mga tawo nga mohimo og maayong mga buhat sama sa gibuhat ni Casul kinsa residente sa Brgy. Looc.

“Mr. Casul is doing his job. Good thing iyaha gihimo. Natabangan mismo ang turismo (sa siyudad),” matud ni Radaza.

Kahinumduman nga usa ka Julius Abendan ang ni-post sa Facebook page sa Top Gear Philippines ug miangkon nga nakahimo sila og traffic violation niadtong tungora.

Giduol sila ni Casul ug gipahibalo sa ilang kalapasan, apan miesplikar si Abendan nga dili siya suhito sa maong lugar ug nagsalig kini sa Google map sa iyang cellphone.

Inay nga tiketan,  gipasaylo ni Casul si Abendan ug gitudloan kini dayon og direksyon padulong sa Lungsod sa Cordova nga maoy destinasyon sa ilang grupo aron mangaligo og dagat.

“He escorted us and showed us the way--instead of issuing us a violation ticket. It was a scorchingly hot Sunday. To thank him, we offered him some money so he could buy himself a drink. But he refused and said he was just doing his job. I hope this story inspires people out there,” matud ni Abendan ngadto sa Facebook.

Sa laing bahin mapasalamaton si Casul sa pagdayeg ni Radaza ug miingon nga dili tanan tawo maka-appreciate sa trabaho sa traffic enforcer sa pagkontrolar sa dagan sa trapiko.

“Pasalamat ko nga na-appreciate nila akong trabaho. Dili tanan enforcers naay dautan nga huna-huna,” matud ni Casul, kinsa wala nakahibaw nga gikuhaan siya og hulagway ni Abendan kaniadtong adlawa.

Si Casul miingon nga nakahibaw ra siya sa maong balita human miadto sa ilahang opisina ug gipahibaw ni Frank Brazil, hepe sa CTMS. (BANAT NEWS)