Sanitary permit ipaestrikto ni Konsehal Japson

CEBU, Philippines -  Gusto ni Konsehal Lea Japson nga estrikto na nga ipatuman sa Cebu City Health Department nga dili gyud tugotan nga maka-operate ang usa ka food ug non-food establishment kun ang iyang mga kawani walay sanitary permit. Gisugyot ni Japson ang usa ka ordinansa nga gihimoan na og public hearing sa Cebu City Council kagahapon ug gisuportahan sa kadagkoan sa Department of Health (DOH) kay gitumong kini aron kaprotehean ang panglawas sa katawhan.

Matud ni Japson nga nakabantay siya nga daghang mga balay-patigayon, ilabi na ang mga water-refilling outlets, nga ang ilang mga kawani walay sanitary permits.

Ang gikabalak-an ni Japson mao nga tingali’g adunay mga kawani sa maong mga balay-patigayon nga adunay mga mananakod nga sakit, sama sa tuberculosis ug makapatakod unya kini sa uban.

Si Dr. Daisy Villa mitataw nga bisan ang mga Automatic Tubig Machines (ATM) nga gibutang daplin sa aseras nga walay nagbantay kuyaw nga mahugawan.

Matud ni Japson nga ang City Health Department kinahanglan nga momando sa mga business establishments nga pakuhaon gyud og X-Ray examination ang mga kawani. Kini base sa lagda sa Presidential Decree No. 856 kon Sanitary Code. (BANAT NEWS)