Penetential walk alang sa kalinaw sa eleksyon

CEBU, Philippines - Liboan ka layko gikan sa nagkadaiyang mga parokya nga sakop sa Archdiocese of Cebu ang gipaabot nga moapil sa Penetential Walk nga ipahigayon ugmang adlawa sa Cebu Metropolitan Cathedral. Si Msgr. Ruben Labajo, ang team moderator sa Cebu Metropolitan Cathedral, mitug-an nga sa dili pa himuon ang penetential walk adunay usa ka santos nga misa ang ipahigayon ug pagapangulohan ni Cebu Archbishop Jose Palma.

Sumala pa ni Msgr. Labajo, ang ipahigayon nga penetential walk subay kini sa hiniusang pag-ampo ug pangaliya sa katawhan alang sa kahapsay ug kalinaw sa nagsingabot nga eleksyon karong Lunes.

Human sa santos nga misa, ipahigayon ang penetential walk nga magsugod sa Cebu Metropolitan Cathedral.

Base sa gipangayo nga permit ni Msgr. Cayetano Gelbolingo, ang penetential walk mosubay sa P. Burgos Street, right turn sa Legaspi Street, right turn sa D. Jakosalem Street, right turn sa Colon Street, right turn sa Mabini Street, dayon balik na sa Cebu Metropolitan Cathedral.

Si Rey Gealon sa Cebu City Transportation Office nitug-an nga mopakatap sila og mga traffic enforcer sa kadalanan nga agian sa penetential walk.

Samtang si Arsobispo Palma miawhag sa katawhan nga moapil sa hiniusang kalihukan. (BANAT NEWS)