Mga pundir nga suga sa mga presinto giayo na

CEBU, Philippines - Gisusi na sa mga kawani sa Department of Public Services (DPS) sa dakbayan sa Sugbo ang tanang mga suga sa lainlaing presinto nga gamiton atol sa eleksyon, aron hayag ang tibuok voting centers karong Lunes.

Matud ni DPS Acting Chief Joel Biton nga duha na sila ka semana nga nagpahigayon og pakisusi ug gipasiga nila ang tanang mga suga nga naa sa sulod ug gawas sa eskuylahan.

Ang DPS adunay lima ka team nga gitahasan sa pagsuroy sa lainlaing mga voting centers. Apil sa ilang gisusi mao ang suga sa mga poste duol sa tunghaan nga adto ipahigayon ang eleksyon.

Giawhag ni Biton ang katawhan nga pahibaw-on ang DPS kun may makita sila nga mga suga diha sulod ug duol sa mga voting centers nga wala magsiga aron maatiman dayon sa iyang mga sakop. (BANAT NEWS)