Mga polis gi-deploy na alang sa eleksyon

CEBU, Philippines - Pipila ka adlaw sa dili pa ang gikahinaman nga eleksyon, gipakatap na sa probinsya sa Sugbo ang mga polis nga sakop sa Quick Response Team (QRT) isip dugang pwersa sa mga polis sa kalungsoran alang sa pagbantay sa piniliay.

Kini ang gitug-an sa direktor sa Cebu Provincial Police Office, Sr. Supt. Clifford Gairanod nga nahinabi sa Banat News.

Ang sakop sa QRT’s naggikan sa Provincial Public Safety Company (PPSC) sa CPPO. Matud pa ni Gairanod nga sayo gipakatap ang maong grupo aron sayo usab nga makahimo og pagpahigayon og checkpoints sa nagkadaiyang dapit.

Sumala pa ni Gairanod bisan asa pwedeng mohimo sa ilang trabaho ang QRT apan prayoridad sa maong grupo nga tabangan ang mga lugar nga kuwang og polis.

Lakip sa prayoridad sa QRT nga bantayan ang mga lugar sa probinsya nga nalakip sa Election Watch list Areas (EWAS) nga naglakip sa pito ka mga lungsod ug usa ka dakbayan.

Numero uno nila nga gitutokan ang mga naglihok nga private armed group’s (PAG’s), mga “goons” sa  mga politiko.

Gitug-an usab sa direktor sa CPPO nga sa pagkakaron duna sila’y gisubay nga impormasyon nga naa’y presensiya sa mga kanhi sakop sa Philippine Constabulary ug mga kanhi sakop sa PNP ang anaa sa usa ka lugar karon nga posibleng gamiton sa mga politiko sa eleksyon.

Sa laing bahin, kapin 200 ka polis ang i-deploy gikan sa Dakbayan sa Lapu-Lapu ug Mandaue alang sa dugang nga augmentation force ug seguridad sa tibuok probinsya sa Sugbu sa  dili pa magsugod ang aktwal nga piniliay karong Mayo 9.

Si Senior Superintendent Jonathan Cabal, hepe sa Mandaue City Police Office mipadala og 130 ka police personnel kagahapon sa buntag samtang ang hepe sa Lapu-Lapu City Police Office nga si Senior Superintendent Arnel Amor Libed nga 145 ka polis ang iyahang i-deploy karong adlawa.

Mitataw si Cabal ug Libed nga adunay mga sakop gikan sa Philippine Air Force ang motabang sa polis sa pagbantay atol sa piniliay.

Samtang alerto na ang kapulisan sa Siyudad sa Talisay sugod karong adlawa tungod sa paghatud na sa mga Vote Counting Machine (VCM) karong buntag.

Ang hepe sa kapulisan nga si Supt. Germano Mallari nitug-an sa Banat News nga inig-abot sa mga VCM  mag-imbentaryo pa niini dayon ihatud kini ngadto sa nagkadaiyang polling centers sa dakbayan. (BANAT NEWS)