Bahandi ni Salimbangon gikwestyon

CEBU, Philippines - Nipasangil si Bogo City Mayor Celestino “Junie” Martinez Jr. nga adunay tinagoang bahandi ang iyang karibal nga si Kongresista Benhur Salimbangon sa ikaupat nga distrito sa Probinsiya sa Sugbo.

Kini human niabot na og P42 Milyones ang gideklarar ni Salimbangon nga net worth sa iyang Statement of Assets, Liabilities and Net Worth sa tuig 2014.

Gikwestiyon ni Martinez ang pagburot sa net worth gikan sa P3 Milyones niadtong sakop pa si Salimbangon sa hunta probinsiyal sa Sugbo sa tuig 1994 nga unta wala man kini negosyo.

Apan gikataw-an lang ni Salimbangon ang pasangil ni Martinez ug gani nigamay man ang iyang net worth dihang nahimo na siyang kongresista.

Pagka-kongresista ni Salimbangon niadtong 2007, iyang gideklarar nga aduna siyay P46.9 Milyones nga net worth. Wala kakuha og kopya si Martinez sa SALN sa kongresista sa tuig 2015 apan si Salimbangon nitug-an nga aduna siyay P41.4 Milyones.

Matud ni Salimbangon nga dihang naundang siya sa politika niadtong 1998, negosyo sa ilang pamilya ang iyang giatiman isip general manager sa MCF Property Ventures hangtud nibalik siya sa politika sa 2007. (BANAT NEWS)