Gitabangan sa 3 magsuon habwa ang tinai

CEBU, Philippines - Nahabwa ang tinai sa 51-anyos nga lalaki human dunggaba og plamingko ug gitabangan og kulata sa tulo ka magsuon sa Bulangsuran, Lungsod sa Samboan pasado alas 2 sa nakalabay nga hapon.

Ang biktima giila nga si Rodrigo Aranas, minyo, ug giingong adunay nervous breakdown. Samtang ang tulo ka magsuon nga suspek giila nga sila si Ricardo Angana, 56; Manolito Angana alyas Noling ug Francisco Angana alyas Nonon kinsa pulos nagpuyo sa maong dapit.

Matud ni Police Officer 1 Jason John Hiramis sa Samboan Police Station nga samtang nagsipit sa iyang manok ang biktima kini nakakita og lalis dihang nilabay sa balay ni Ricardo.

Atol sa ilang lalis nagkasinukmagay ang duha ug nilaban ang lain niini nga mga igsuon.

May nakakita nga nikuha og kahoy si Francisco ug gibunalan sa ulo si Aranas hangtud nga kini natumba ug giyak-an ni Ricardo ug didto gihansakan ang tiyan sa plamingko samtang si Manolito ang giingong nibunal sab og tubo sa biktima.

Sigun pa ni Hiramis nga maayong pagkahiwa sa tiyan sa biktima.

Sulay pa unta nga gidala sa Santander Municipal Health Center apan kini patay na nga nadangat sa tambalanan.

Human sa hitabo nadakpan usab sa kapolisan ang tulo ka magsuon ug narekober ang 14 pulgadas nga plamingko.

Samtang sa Lungsod sa Alcantara, nagkadugo ug wala nay kinabuhi nga nakit-an sa usa ka barangay tanod ang 62-anyos nga lalaki nga nakaangkon og samad sa dughan nga nahagba kilid sa dalan sa Barangay Candabong pasado alas 5 sa nakalabay nga buntag.

Giila ang biktima nga si Angelo Lambo, biyudo nga nagpuyo sa maong dapit.

Sumala pa ni Senior Police Officer 1 Nestor Tonilon, imbestigador sa Alcantara Police, nga gikan nitambong sa disco sa ilang barangay ang biktima ug pasado alas 4 na sa kadlawon niuli nga pwerteng huboga.

Nagduda si Tonilon nga posibleng igo lang gipareglahan ang biktima gumikan kay wala man kini nakakita og gubot sa diskohan. (BANAT NEWS)