Davide giampoan sa mga pastor
CEBU, Philippines - Pundok sa mga pastor nga sakop sa National Auxiliary Chaplaincy Philippines (NACPHIL) ang nipadayag sa ilang suporta sa kandidatura ni Gobernador Hilario Davide III.
Ang mga pastor niadto sa buhatan sa gobernador sa Kapitolyo kagahapon ug nitanyag og pag-ampo alang ni Davide ug personal nga nipadayag sa ilang suporta.
Si Pastor Vergulo Lescano nagkanayon nga ilang nakita ang potensyal ni Davide ug nagtuo nga angayan kini modumala sa probinsiya.
Matud niya nga karong Domingo maoy uwahing adlaw sa pagpahibalo nila sa ilang mga sakop sa angay nga botohan.
Gitataw hinuon ni Ramil Jawili, regional director sa NACPHIL sa Sugbo, nga walay block voting sa ilang grupo ug hatagan nila og kagawasan nga makapili sa ilang kandidato apan ilang giawhag ang mga sakop nga pilion ang kandidato nga maayong motrabaho.
Wa usab magpasabot nga ilang pagsuporta kang Davide nisuporta sila sa kandidatura sa standard bearer sa Liberal Party nga si Mar Roxas.
Si Davide sa iyang bahin nalipay sa pagsuporta kaniya sa NACPHIL.
Matud niya nga niadtong 2013 nisuporta gihapon ang maong organisasyon kaniya.
Apan gitataw sa gobernador nga bisan sa suporta, dili angay nga mokompiyansa sa umaabot nga piniliay.
Ang NACPHIL usa ka non-government organization nga adunay adbokasiya sa pag-implementar sa moral recovery program.
Nakig-alayon usab sila sa Department of Social Welfare and Development sa pagpatuman sa Pantawid Pamilyang Pilipino Program (4Ps).
Ang grupo adunay dul-an sa 2,000 ka sakop sa probinsiya. (BANAT NEWS)
- Latest
