Team Rama suportado sa urban poor

CEBU, Philippines - Pormal nga giendorso sa mga urban poor leaders sa Dakbayan sa Sugbo ang Team Rama atol sa 2nd Homeowners Association Conference kagahapon sa White Gold House Restaurant.

Si Atty. Collin Rosell, kasamtangang hepe sa Division for the Welfare of the Urban Poor, nagkanayon nga adunay 41,000 nga sakop ang urban poor groups sa dakbayan nga gipaabot nga mosuporta sa Team Rama.

Sa maong conference nagpahigayon usab og covenant signing ang Team Rama diin kini nagtinguha nga maangkon na sa mga urban poor ang mga pribadong luna nga gipuy-an nila pinaagi sa pagpalit sa kagamhanan aron dili na sila mahimong squatter ug nga dili sila ma-demolish.

Matud ni Robert Barquilla, non-investigation section head sa DWUP, nga ang nitambong sa maong conference nikabat sa 1,042 nga gilangkuban sa mga presidente inubanan sa laing duha ka opisyal sa dili mominus sa 500 ka homeowners association.  

Nidugang si Barquilla nga ang DWUP igo lang sa pag-facilitate sa maong conference tungod sila ang nakahibalo sa tanang homeowners association sa dakbayan.

Si Samsin Chui, presidente sa Urban Poor Solidarity Federation niingon nga si Mayor Michael Rama ang ilang suportahan tungod nakita niya ang maayo nga pagdumala para sa kaayuhan sa urban poor. 

Kung masublian sa ikatulo nga termino si Rama, buot ni Chui nga ipasar ang people empowerment ordinance nga susama sa Naga City sa Camarines Sur.

Samtang gipasalig sa Team Rama nga walay pagpanikas nga buhaton sa ilang kampo atol sa eleksiyon.

Kini human sa pasangil nga ilang gibansay ang mga watchers sa pagpanikas.

"Lisud manikas because we are trained to follow the law," matud ni Rama atol sa 888 News Forum sa Marco Polo Plaza kagahapon.  

Ang mga kaalyado ni Rama nga sila si Konsehal Gerry Carillo ug Alvin Garcia kinsa mga kandidato sa pagka-kongresista sa south ug north districts nagkanayon nga desperado na ang ilang mga kaatbang nga namasangil.  (BANAT NEWS)