Trapik gilikayan sa caravan ni Radaza

CEBU, Philippines - Gisakripisyo ni Lapu-Lapu City Mayor Paz Radaza ang gikatakda unta nga caravan sa Liberal Party-Deretso karong adlawa aron malikayan nga makamugna og kahuot sa dagan sa trapiko nunot sa nagpadayong pag-ayo sa Mandaue-Mactan Bridge.

Napanglantawan nga dili maayo ang mahimong epekto ngadto sa ilang kampo sanglit daghan gyud ang mga motorista nga masuko kay matanggong sa grabeng trapik.

Gusto lang ni Radaza nga dili sila ang mahimong hinungdan sa grabeng trapik sa siyudad ilabi na nga daghan ang mangagi kay daghan ang nagtrabaho sa Lapu-Lapu nga gikan sa Siyudad sa Sugbo ug Mandaue ug usab moagi sa Mactan-Cebu International Airport. Gihulip nga kalihukan mao ang handshaking sa nagkalain-laing barangay sa dakbayan.

Gitataw ni Radaza nga ang ubang partido nga mopahigayon og caravan ang mokuha gyud og permit sa City Hall. Niadtong niaging adlaw ang grupo ni Rolando Patalinjug sa Team Kusgano nipahigayon na og caravan samtang ang partido ni Efrain "Jun" Pelaez gikatakda nga karong Mayo 6 mohimo sa ilang caravan.

Samtang gihulagway ni Radaza nga pangilad ang gihimo sa iyang kaatbang sa Team Kusgano labot sa pagpangapod-apod og insurance card.

Usa ka Evelita Berido nga giingong asawa sa usa sa mga lider ni Patalinjug ang nadisgrasya sa niaging semana sa habagatang bahin sa Sugbo ug nakaangkon kini og bali sa iyang abaga. Matud pa nga si Berido nagpatambal sa usa sa mga tambalanan sa siyudad sa Sugbo apan giingong wala dawata ug gibalibaran sa insurance company kay walay pundo ang insurance card. Gipakita ni Radaza sa mga tigbalita ang giingong card nga gihatag nga adunay hulagway ni Patalinjug nga kandidato sa pagka-mayor, Celedonio Sitoy sa pagka-kongresista ug Rufo Amores sa pagka-bise mayor. Gisaway ni Radaza ang paghatag sa insurance card ug niingon nga dunay ikagasto sa dagkung campaign posters apan walay ikahatag nga tabang ngadto sa tawo nga nanginahanglan.

Plano karon sa kampo ni Radaza ang pagpasaka og kaso batok sa Team Kusgano sanglit ilaha kining gihulagway nga pamaagi sa vote buying. Samtang si Patalinjug niklaro nga ang insurance card sa dili pa magamit kinahanglan aprobahan sa authorized agency ug tinuod nga wala pay pundo.

Wala usab siya kaila ni Berido ug wala kini niduol kaniya aron mangayo og tabang. (BANAT NEWS)