Grand rallies giandaman

CEBU, Philippines - Gikatakda ang dagkung rally sa Liberal Party ug One Cebu Party sa Dakbayan sa Mandaue karong Sabado nga maoy katapusang adlaw sa pagpangampanya alang sa Mayo 9 nga eleksiyon.

Ang kampo nilang Mayor Jonas Cortes ug Kongresista Gabriel Luis Quisumbing mopahi-gayon sa grand rally sa dakung hawan sa North Reclamation Area.

Gilauman nga tambungan kini sa mga personalidad sa LP gikan sa kauluhan sama nilang Mar Roxas ug Leni Robredo ug sila si Gobernador Hilario Davide III ug Bise Gobernador Agnes Magpale. Samtang ang kampo ni Konsehal Emmarie “Lolypop” Ouano-Dizon sa One Cebu Party mopahigayon usab sa ilang dakung rally sa dakung hawan sa Barangay Paknaan nga tambungan usab nilang Winston Garcia, Nerissa Soon-Ruiz ug Paulus Mariae Canete.

Gipaabot usab nga motambong sa rally ang mga kaalyado sa One Cebu nga sila si Rodrigo Duterte ug Senador Alan Peter Cayetano ug mga kandidato sa pagka-senador.

Sa Dakbayan sa Naga, sayo nga gihuman sa grupo ni Atty. Kristine Chiong ang ilang kampanya.

Matud sa amahan ni Chiong, Mayor Valdemar Chiong, nga gihimo nila ang grand rally niadtong Domingo diin gitambungan sa bagang duot sa katawhan.

Hinuon giklaro ni Mayor Chiong nga bisan dili na mangampanya ang ilang kampo, panahon na nga ilang pahinumduman ang ilang mga lider sa ilang trabaho sa adlaw sa piniliay. Nitambong sa rally si Kongresista Gerald Anthony Gullas Jr., ug kaubanan sa LP nga sila si Davide, Magpale ug Yolanda Daan ug Atty. Raul Bacaltos.

Si Atty. Chiong giatbangan sa kandidato sa One Cebu Party nga si Konsehal Vince del Mar. (BANAT NEWS)