MCWD: Paigo pa ang tubig

CEBU, Philippines - Walay mahitabo nga pagrasyon og tubig sanglit igo pa ang gidaghanon sa suplay niini dinhi sa Dakbayan sa Sugbo. 

Kini ang pamahayag sa tigpamaba sa Metropolitan Cebu Water District nga si Charmaine Kara, bisan pa man sa nasinating epekto sa El Niño dinhi sa dakbayan.

Matud ni Kara nga ang 80 porsiyento sa suplay sa tubig nagikan sa mga bank water supply ug ground water supply, samtang ang 20 porsiyento niini gikan sa Jaclupan Dam ug Buhisan Dam.

Siya nagkanayon nga igo pa kini nga makasustiner sa gikinahanglang suplay sa tubig nga 12,000 cubic meters sa Jaclupan Dam.

Apan mipahimangno si Kara sa dili pag-usik-usik sa tubig, bisan pa man sa kasiguraduhan nga igo pa ang suplay niini sa pagkakaron.

Si Kara mipahibalo nga sila sa MCWD wala pa makatino kung misaka o miubos ba ang naapektuhan sa suplay sa tubig, apan mipasalig nga sulod niining semanahuna, mupagawas sila og impormasyon kalabot niini.    

Sa laing bahin, si Joelito Baclayon, city agriculturist nagkanayon nga kagahapon nakahatag na sila og tag 10 ka drums nga tag 200 ka litro ug 10 usab ka hose nga may gitas-on nga 300 metros sa matag farmers association didto sa Brgy.Taptap.

Pagkakarun, miabot na og 110 ka hose ug 56 ka electric pumps ang nahatag sa kagamhanan sa Sugbo ngadto sa mga mag-uuma.

Matud ni Baclayon nga kadtong wala makadawat kagahapon, posibleng mahatagan ugma o sa Miyerkules.

Si Baclayon miklaro nga ang budget sa maong pagpanghatag gikuha gikan sa P3 milyones nga budget sa miaging tuig ug adunay dugang nga P29.7 milyones aron gamiton sa pagpalit og abuno, drums, hose ug water pumps. (BANAT NEWS)