Pag-ampo giawhag sa eleksiyon

CEBU, Philippines - Giawhag ni Auxiliary Bishop Oscar Jaime Florencio ang katawhan sa pag-ampo sa nahabiling adlaw sa umaabot nga eleksyon.

Matud ni Florencio nga kinahanglan nga niining nagsingabot nga eleksyon ang hiniusa nga pag-ampo alang sa kalinaw ang gikinahanglan bisan kinsa ang modaug.

Sumala pa ni Florencio nga ang eleksyon dili lang para sa kaugalingon ang pagpili og kandidato ug kinahanglan gyud sundon ang mga giya nga gitudlo sa Cathechism ug 10 Commandments aron makapili og tiunay nga modumala sa pangagamhanan.

Si Florencio nipadayag nga kinahanglan paminawon gyud sa katawhan ang ilang konsensiya sa pagpili sa mga haum nga politiko.

Giawhag usab ni Florencio ang mga bag-ong botante nga dili magpadala sa ilang naghikabhikab nga pagbati sa pag-abot sa eleksyon.

Dugang niya nga mas maayo nga dili magpanuko og pangayo og advice ang kabatan-onan sa ilang mga katigulangan una sila mopaguwa sa ilang desisyon kung kinsa nga politiko  ang pilion.

Subling gibutyag ni Florencio nga sa nagsingabot nga eleksyon kinahanglan usab mag-ampo ang mga batan-on sa ilang pagbotar. (BANAT NEWS)