PJ: Juvenile justice law giabuso

CEBU, Philippines - Angayan na usbon ang Juvenile Justice Law tungod kay giabuso kini ug ang mga menor de edad gigamit sa mga sindikato sa krimen.

Kini sumala pa ni kanhi kongresista Pablo John Garcia kinsa magpapili sa samang posisyon sa ikapitong distrito sa Probinsiya sa Sugbo ubos sa One Cebu Party.

Atol sa Know Your Candidates sa The Freeman/Banat News roundtable discussion kagahapon, si Garcia nagkanayon nga kung ang polis pangutan-on, moingon kini nga ang balaud ni Senador Francis “Kiko” Pangilinan giabuso sa mga sindikato.

Kini pinaagi sa paggamit sa mga menor de edad tungod kay dili sila mapasakaan og kaso.

Matud ni Garcia nga dunay mga komedya nga ang mga menor de edad nga gigamit sa mga sindikato magdala-dala pa og birth certificate kay kung dakpon duna silay ipakita nga kamatuoran nga sila menor de edad. Si Garcia buot nga ibalik ang daan nga balaud diin ang 9-anyos paubos mao ang ma-exempted sa kaso apan ang lapas sa 9-anyos nga ilang kabubut-on ang paghimo sa krimen ang mapasakaan og kaso.

Angay nga motan-aw kung dunay discernment ang gibuhat sa menor ang huwis ug dili ang social welfare officer.

Subay niini, kabahin sa problema sa ginadiling drugas si Garcia nagkanayon nga angayang i-review ang mga balaud aron makagama og maayong istraktura alang sa maayong organisasyon batok sa ginadiling drugas. (BANAT NEWS)