Mga polis sa pinamungajan gipaubos sa drug test

CEBU, Philippines - Mga sakop sa Pinamungajan Police lakip sa hepe ang gipaubos sa kinalit nga “drug test” kagahapon sa buntag human napusilan sa paa ug nadakpan sa mga sakop sa Provincial Intelligence Branch (PIB) ang imbestigador sa Pinumungajan Police atol sa buy-bust operation nga gihimo sa maong lungsod niadtong adlaw nga Biyernes.

Sa impormasyon nga gipaabot ni Supt. Rex Derilo, hepe sa Regional Intelligence Division (RID-7) nga mismo ang hepe sa Pinamungajan Police nga si Police Insp. Gilfred Baroman maoy una nga mipaubos sa drug test sunod ang iyang 22 ka mga sakop. Ang tanan nag-negatibo.

Gihimo ang drug test human naaresto sa PIB si Police Officer 1 Ian Patrick Carvellida, ang nag-inusarang imbestigador sa maong buhatan.

Siya napusilan human sulay nga misukol sa dihang gironda ang drug den nga gisuyopan sa maong polis diha sa Barangay Poblacion.

Samtang si Sr. Supt. Rey Lyndon Lawas ang deputy regional director for operations sa Police Regional Office -7 mibutyag nga nakugang sa maong balita.

Si Carvellida mitug-an usab nga gawas kaniya aduna pay laing duha ka mga kaubang polis nga magbisitahan sa maong drug den.

“It is surprising to know man gud nga only in one setting nadakpan ang usa and attempted to fight back pa sa operating personnel. Ang two (laing mga polis) kay based on the accounts of na arrested nga that day naay two other policemen,” matud pa ni Lawas.

Kini ang hinungdan nganong gihimo ang drug test sa maong police station.

Sa pagkasikop ni Carvellida gipasabot ni Lawas nga kini nagpamatuod lang nga seryoso ang ilang buhatan sa paglimpyo sa ilang organisasyon. (BANAT NEWS)