‘Yellow cards’ gipanghatag sa 4Ps beneficiaries?

CEBU, Philippines - Human sa giingong paggamit sa Pantawid Pamilyang Pilipino Program (4Ps) sa mga kandidato sa Dakbayan sa Lapu-Lapu ug Lungsod sa Tuburan, mga “yellow cards” gipangapod-apod usab ngadto sa mga beneficiaries sa programa sa ikatulong distrito sa Probinsiya sa Sugbo.

Ang tinubdan sa Lungsod sa Pinamungajan nipasangil nga si Bokal Grecilda Sanchez-Zaballero, kandidato sa pagka-kongresista, ug Konsehal Jeffrey Anthony “Tonton” Yapha, kandidato sa pagka-bokal, ang nigamit sa mga beneficiaries sa maong programa sa gobiyerno.

Ang yellow cards nga adunay suwat nga “Gasa sa Gugma Movement” adunay hulagway ni Zaballero, Yapha ug Liberal Party standard bearer Mar Roxas ug Leni Robredo.

Nasuwat usab ang precinct number ug voters’ ID number sa miyembro.

Apan si Zaballero niklaro nga wala sila’y gipili sa gihatagan ug wala sila nangutana kung miyembro ba sa 4Ps ang tawo nga hatagan.

“Basin gusto sad sila mangayo kay ako hatagan,” matud ni Zaballero.

Dugang ni Zaballero nga mismo si Kongresista Gwendolyn Garcia adunay Gwen card nga gipangapod-apod sa mga scholars ug supporters.

“What’s wrong with that? In a campaign, it’s like that,” matud ni Zaballero.

Gani matud niya nga wala siya nabalaka nga ang iyang mga tarpaulins gipanglangkat sanglit nasayud siya nga naa na siya sulod sa kasingkasing sa katawhan. (BANAT NEWS)