Martin Romualdez nabalaka sa tikas
CEBU, Philippines - Giawhag ni senatorial candidate Martin Romualdez ang Commission on Elections nga moimbestigar na sa giingong tikas nga nahitabo sa Overseas Absentee Voting bisan walay reklamo nga isang-at.
Kini nunot sa iyang kabalaka nga makaapektar sa integridad sa eleksiyon karong Mayo 9 ang nahitabo sa pagbotar sa usa ka Andresa Amba sa Hong Kong diin ang boto ni Romualdez didto naihap kang Neri Colmenares.
Sama usab ang nahitabo sa kang Senador Ferdinand “Bongbong” Marcos Jr. sa iyang botos sa Hong Kong, Dubai, Kuwait ug Okinawa nga didto naihap sa kaatbang nga si Senador Gregorio Honasan sa pagka-bise presidente.
Si Romualdez nagtinguha nga mosang-at og pormal nga reklamo sa Comelec sa higayon nga makakuha na siya og mga dokumento sa nahitabong tikas sa nagpadayong Overseas Absentee Voting.
Matud ni Romualdez nga dili mahimong piyongan lang sa Comelec ang nahitabo sanglit posible nga mahitabo kini sa Mayo 9 nga eleksiyon.
Sayo niini si Romualdez niawhag sa Comelec ug Smartmatic-Total Information Management (TIM) Corp. sa pagpasabot nganong wala nagtakdo ang botos sa balota ug sa printed voters’ receipts sa OAV. (BANAT NEWS)
- Latest
