Di lang taga Cebu ang makatrabaho

CEBU, Philippines - Ang paghatag og daghang trabaho ang sentro sa mga programa nilang Atty. Winston Garcia ug Dr. Nerissa Soon-Ruiz kung mapiling gobernador ug bise gobernador sa Probinsiya sa Sugbo.

Sukad nipahibawo si Garcia sa iyang pagpapili sa pagka-gobernador sa Agosto sa niaging tuig, daghang trabaho dili lang sa mga Sugbuanon apan lakip na sa Kabisay-an ug Mindanao ang tumong sa iyang mga gidamgo nga proyekto.

Buot si Garcia nga dili lang sa adlaw sa pamuo o Labor Day matag Mayo 1 nga adunay mga kahigayunan sa panarbaho pinaagi sa jobs fair kun dili sa tibuok tuig gyud.

Gisanglitanan ni Garcia ang pagmugna og tourism zone sa Lungsod sa Cordova nga napanglantawan nga makahatag og 150,000 ka direct jobs ug 600,000 ka indirect jobs.

Ang bag-ong international port sa Liloan ug Consolacion makahatag usab og 100,000 direct jobs ug 400,000 indirect jobs.

Ang Talisay-Carcar reclamation ang makahatag usab og dili mominus 600,000 ka direct jobs ug 2.5 milyones nga indirect jobs.

Tinguha ni Garcia nga dili molangyaw pa ang mga Sugbuanon sanglit daghan na ang kahigayunan nga makatrabaho nga dili malayo sa pamilya. (BANAT NEWS)