Contractualization ipahunong–ALU

CEBU, Philippines - Nagmartsa ang kapin 6 mil ka sakop sa Associated Labor Union-Trade Union Congress of the Philippines (ALU-TUCP) kagahapon sa hapon agi og pagsaulog sa Adlaw sa Pamuo.

Si Atty. Jonas Asis, regional vice-president sa ALU-Central Visayas, miingon nga miabot gyud og 6 mil ka miyembro sa ALU-TUCP ang miapil sa maong "kasaulogan."

Ilang gisaulog ang adlaw sa pamuo pinaagi sa pagmartsa sa Osmeña Boulevard ug gisundan kini og usa ka Santos nga Misa ug usa ka programa nga ang tumong mao ang pag-awhag sa kagamhanan nga ipahunong ang "contractualization."

Karong tuiga natumong usab nga panahon sab sa piniliay busa hangyo sa mga mamumuo nga mapasar na ang "Security of Tenure Bill" nga gipangamahanan sa representante sa ALU-TUCP Partylist.

Gihimakak usab ni Asis nga gi-edosar sa ALU-TUCP ang Bando Osmeña Pundok Kauswagan apan matud niya nga dunay mga sakop sa ALU nga nakauyon sa BOPK.

Gitataw sab ni Asis nga walay kandidato sa BOPK nga nikuyog sa pagmartsa nila apan dunay mga supporter ang miadto.

Si Art Barrit ang tigpamaba sa ALU-TUCP miingon nga ang misuporta ni Tomas Osmeña mao ang Oriental Port and Allied Services Corporation (OPASCOR).

Apan walay laing giimbitar sa maong kalihokan gawas sa BOPK ug ni Martin Romualdez nga milansar pagka senador.

Si Asis miingon nga mas daghan ang miapil sa ilang pagmartsa karong tuiga kompara sa 4 mil sa milabay nga tuig. (BANAT NEWS)