Suspek sa tulis sa Bogo ‘mangawatay’ sab og motor

CEBU, Philippines - Gipresentar sa Cebu Provincial Police Office (CPPO) ang suspek sa pagpanulis sa Dakbayan sa Bogo kagahapon sa buntag.

Apan dihang nahinabi sa mga tigbalita ang dinakpan nga si Jekie Sentillas iya gihimakak nga nalambigit siya sa pagpanulis sa tindahan hinuon giangkon niya nga siya kuyog sa mga mangawatay og motor.

Si Sentillas usa ka notado nga kawatan sa motor og usa sab nga giila nga suspek sa pagpanulis sa tindahan sa Dakbayan sa Bogo.

Sakop sab si Sentillas sa dakung sindikato sa pagpanulis og drugas sa amihanang bahin sa probinsiya nga mao ang Montealto Robbery/Drug Group.

Matud ni CPPO Director Clifford Gairanod nga nagpahigayon og hot pursuit ang Provincial Anti-Illegal Drugs Special Operation Task Group, Provincial Intelligence Brach (PIB), Bogo Police Station ug Mandaue City Police Office Special Weapon and Tactics Team.

Kini human nakadawat og impormasyon ang kapolisan nga si Sentillas nakit-an sa Mandaue.

Nakuha kang Sentillas ang duha ka motor nga XRM; usa ka Mio; duha ka Rusi; ug usa ka Duke nga gituohang mga kinawat. Apan matud ni Sentillas nga igo ra siya momaneho sa kinawat nga motor nga gikuha sa iyang kauban.

Gihagit niya ang kapolisan nga magpakita og video footage nga makapamatuod nga apil siya sa pagpanulis.

Si Sentillas usab ang usa sa mga subject sa buy-bust operation sa kapolisan sa Dakbayan sa Bogo niadtong Abril 23 sa Barangay Sambag apan nakasibat. (BANAT NEWS)