Final testing ug sealing sa VCMs himuon sa Mayo 6

CEBU, Philippines - Karong umaabot nga Mayo 6 gitakda ang pagpahigayon sa final testing and sealing sa vote counting machines (VCMs) sa Commission on Elections pagpangandam sa adlaw sa piniliay karong Mayo 9.

Matud ni Atty. Elesio Labaria OIC sa provincial Comelec nga simultaneous ang pagpahigayon sa FTS sa mga gymnasiums o di ba kaha auditoriums sa nagkadaiyang lugar sa nasud.

Ang tumong niini mao ang pagsiguro sa seguridad ug katukma sa VCMs nga gamiton atol sa eleksyon.

Atol sa maong kalihokan, adunay aktwal nga pagboto gamit ang mga balota alang sa FTS. Human niini ang VCM mopagawas og walo ka kopya sa resulta.

Matud ni Labaria, nga ang balota nga mahagbong gikan sa VCM i-check o bilangon kini sa mga board of election inspectors ug ang tanang receipt nga mogawas sa VCM, pirmahan kini sa mga BEIs ug isulod sa usa ka envelope ug selyohan ug pirmahan usab ang maong envelope.

Si Labaria nagkanayon nga kinahanglan nga wa nay sulod ang ballot box ini’g human sa FTS lakip na usab ang VCMs kinahanglang limpyo na o wala nay sulod alang sa adlaw sa eleksyon.

Apil sa pagpahigayon sa final testing and sealing mao ang mga BEIs, support staff, VCM technician, watchers, PPCRV ug C-CIMPEL. Si Labaria nagkanayon nga ang FTS mao ang pag- test sa mga machines sa peripherals niini kung kumpleto ba, ang dagan o proseso sa mga BEIs kung sakto ba, lakip na ang pagsaksi kun mokaon ba gyud og balota ang machine ug sakto ba ang resulta nga mogawas.

“Ato i-test if ga-function (ang VCM) as they are expected to function” matod ni Labaria.

Human sa FTS ang mga VCMs isulod sa kahon ug selyohan ug hipuson ngadto sa room o opisina sa prinsipal, mamahimo usab nga adto ibutang sa sociall hall sa munisipyo apan kinahanglan kining bantayan sa mga polis 24 oras hangtod na sa petsa 8 sa gabii ug dayon hatod sa mga polling areas.

Matud ni Labaria karong Mayo 4, sugdan sa Comelec ang paghatud sa mga VCMs ngadto sa mga lugar hilabina sa mga isla ug lagyo nga lugar sa probinsya. (BANAT NEWS)