Kapolisan, suspek sa tulis nagginukdanay

CEBU, Philippines - Nadakpan sa mga sakop sa Provincial Intelligence Branch sa Cebu Provincial Police Office ang 23-anyos nga lalaki nga gitudlo nga nalambigit sa pagpanulis sa usa ka tindahan sa Carbon, Dakbayan sa Bogo niadtong Domingo.

Pasado alas singko sa nakalabay nga kadlawon, hilom nga niadto ang mga sakop sa PIB sa Kamputhaw, Dakbayan sa Sugbo human nasayri   nga didto nagtago ang suspek nga si Jess Sentillas sa iyang mga paryente.

Apan abtik usab nga nakabantay ang suspek ug dali kining nilayat sa bintana ug nisutoy sa pagdagan hangtud nahitabo ang ginukdanay.

Matud ni Senior Police Officer 1 Reynaldo Solante sa PIB nga nisakay og habal-habal ang suspek paingon sa Banawa ug nisakay na usab og laing habal-habal ug nagpahatud sa norte nga bahin sa probinsya.

Niabot og halos unom ka oras ang ginukdanay tali sa kapolisan ug sa suspek hangtud nga kini ilang nadakpan sa Lungsod sa Consolacion human nihunong ang drayber sa motorsiklo kay wala nagkasinabot sa pletehan.

Sa gihimo nga interogasyon sa kapolisan niangkon ang suspek nga sakop kini sa usa ka sindikatong grupo nga gipunduhan sa usa ka lalaki nga Tagalog apan nihimakak nga nalambigit kini sa pagpanulis.

Nasayran usab sa kapolisan nga gusto na unta mogawas sa grupo si Sentillas apan gibaharan kini nga patyon kung motiwalag.

Hinuon gipasabot ni Solante nga may pending sab nga warrants ang suspek gumikan sa kaso sa pagpangawat og motorsiklo.

Nagpadayon pa ang gihimo nga imbestigasyon alang sa pagsubay sa grupo samtang gitanggong ang suspek aron pasakaan og tukmang kaso. Atol sa pagpanulis nasakiyo sa tulo ka tulisan ang P100,000 apan ang suspek nga si Sentillas nailhan sa kuha sa close circuit television (CCTV) camera.

Human sa hitabo, ang direktor sa CPPO, Senior Supt. Clifford Gairanod, nimando nga pangitaon ang mga tulisan.

Gawas sa kuha sa CCTV, ang mga testigos niila usab ni Sentillas nga naapil kini sa krimen.

Ang pagpanulis nahitabo pipila ka adlaw lang usab sa pagpanulis sa usa ka cellshop ug mall sa maong dakbayan. (BANAT NEWS)