500 pamilya apektado sa huwaw gitabangan

CEBU, Philippines - Mokabat sa 500 ka pamilya nga apektado sa huwaw sa 31 ka barangay sa kabukiran sa Dakbayan sa Sugbo ang nakadawat na og ayuda gikan sa Department of Social Welfare and Services.

Matud ni Dr. Ester Concha, pangulo sa DSWS, nga niadtong Sabado hangtud kagahapon nahurot nila pagpanghatag ang south ug north upland barangays nga apektado sa huwaw.

Tag-tulo ka kilo nga bugas ug lima ka de lata nga pagkaon ang gipanghatag.

Ang pagpanghatag gibase sa listahan nga gihatag sa kabarangayan nga gi-verify sa City Agriculture Office nga pinirmahan ni City Agriculturist Joey Baclayon.

Matud ni Concha nga nakita gyud nila ang sobra nga panginahanglanon sa katawhan sa pagkaon ug gani usa sa mga residente sa Barangay Sapangdaku ang nihilak tungod kay grabe ang nasinati nilang kagutom.

“Sa Barangay Sapangdaku, naa gyuy naghuwat namo nga naghilak kay walay malung-ag,” asoy ni Concha.

Gitug-an ni Concha nga karong adlawa ikaduhang hugna sa tabang ang ilang ipakatap diin kadtong mga pamilya nga wala nakadawat sa unang hugna maoy ilang seguruhon sa paghatag.

Gipahibawo ni Concha nga dul-an sa P6 milyones ang ilang napagawas alang sa maong hinabang nga gikuha sa calamity fund diin 1,800 ka sakong bugas ang ilang napalit.

Si Concha nipadayag nga andam siya mo-request og dugang budget kung makita pa niya ang dugang pa nga panginahanglanon ilabi na kung magkagrabe ang sobrang kainit sa panahon.

Paningkamutan sa DSWS nga sa sunod hugna tag-unom na ka kilo ang ilang ipanghatag lakip na ang lima ka de lata.

Samtang dala sa hangin gikan sa sidlakan nga gitawag og easterlies ang pat-ak nga pag-uwan nga nasinati sa Metro Cebu, matud ni Engr. Manny John Agbay, weather forecaster sa PAGASA-Mactan.

Gibutyag sa ahensiya nga niadtong Abril 13 maoy maximum nga ilang na-record nga nakasinati ang Metro Cebu og grabe nga kainit nga niabot sa 34.9 degree Celsius.

Apan matud ni Agbay nga nagka-us-os ang kainiton sa temperatura human   kagahapon sa alas 11:10 sa buntag nitala sila og kainiton nga 33.3 degree Celsius.

Hinuon giklaro niini nga dunay posibilidad nga mosaka kini og balik sanglit gibana-bana nga mas mograbe ang epekto sa El Niño sa buwan sa Mayo.

Samtang gilauman nga human sa El Niño dunay posibilidad nga sa mga mosunod nga mga buwan masinati ang La Niña o ang sagunson nga pag-uwan.

Tungod niini kun dunay bagyo nga mosulod sa Philippine Area of Responsibility posible nga mas mokusog kini tungod sa epekto sa La Niña. Rowena D. Capistrano, Merybeth I Fernandez ug Decemay P. Padilla (BANAT NEWS)