10 bag-ong sakyanan sa CCPO

CEBU, Philippines - Nihatag og 10 ka sakyanan ang kagamhanan sa Dakbayan sa Sugbo ngadto sa Cebu City Police Office.

Matud ni Mayor Michael Rama nga si CCPO Director  Benjamin Santos Jr. ang naghangyo sa maong mga sakyanan.

Ang upat ka Toyota Fortuner nagkantidad og P1.5 milyones ang usa ug ang unom ka Mitsubishi Adventure nagkantidad og P1.025 milyones ang usa.

Matud ni Konsehal David Tumulak nga 10 ka Fortuner ug 18 ka Adventure ang ilang ihatag ngadto sa CCPO.

Si Santos niklaro nga niadto pang niaging tuig nila gihangyo ang mga sakyanan apan niadtong Miyerkules sa gabii lang nahatag atol sa command conference sa tanang station commanders nga gipatawag ni Rama.

Apan si Konsehal Alvin Dizon nikwestiyon sa tayming sa pagpanghatag.

Matud ni Dizon nga ilang susihon kung aduna bay kalapasan ang pagpanghatag sa mga sakyanan ilabi na nga gihimo kini sa dili oras tingtrabaho.

Si Commission on Elections-7 Director Jose Nick Mendros nipadayag nga may katungod si Rama nga makigtagbo sa iyang mga department heads ug uban pa kay siya pa man ang mayor.

Apan si Mendros nipadayag usab nga andam siya modawat kung may reklamo nga isang-at sa iyang buhatan labot sa gibuhat ni Rama aron mahatagan og katin-awan. - Sheriza Mae R. Uy, Rowena D. Capistrano ug Intern Jannine Mendaros (BANAT NEWS)