40 hugawan sa BOPK rally nadakpan

CEBU, Philippines - Dul-an sa 40 ka tawo nga supporters sa Bando Osmeña Pundok Kauswagan ang na-isyuhan og citation ticket sa Cebu City Environmental Sanitation Enforcement Team (CESET) atol sa gipahigayong rally atubangan sa Kapitolyo.

Matud ni Grace Luardo, pangulo sa CESET, nga wala silay pagpihig-pihig sa pagpatuman sa balaud hinungdan nga aduna gyud silay mga naisyuhan og citation tickets diin duha ang nagpataka og pagpanigarilyo ug 39 sa pagpataka og labay sa basura.

Sumala pa ni Luardo nga mas gamay ang naisyuhan sa rally sa BOPK kung ikomparar sa nilabay nga rally sa Team Rama tungod kay adunay nagpahimangno kanunay matag human sa speech sa mga kandidato sa dili pagpataka og labay.

Dugang ni Luardo nga aduna gihapoy mga tawo nga gahi og ulo nga gusto lang ang ilang kaugalingon ang tumanon kay bisan og adunay mga pahimangno padayon gihapon ang pagpataka og labay.

Si Luardo nipadayag nga hatagan nila og pito ka adlaw ang mga naisyuhan og citation ticket sa pag-settle sa ilang multa.

Gitug-an ni Luardo nga dili hinuon kaayo daghang basura nga nakuha gikan sa rally kay upat lang ka tricycle ang ilang gigamit paghakot.

Si Mayor Michael Rama sa iyang bahin nitug-an nga wala siyay kamanduan nga gihatag sa CESET ug igo ra kining naghimo sa ilang trabaho.

Gipadayag ni Rama nga atol sa ilang rally nga gipahigayon sa Plaza Independencia may mga naisyuhan usab sa CESET tungod sa pagpataka og labay ug pagpangihi sa pangpublikong lugar. (BANAT NEWS)