“Karnaper” patay sa shootout

CEBU, Philippines - Napusilan patay sa polis ang usa ka bana ug nasikop usab ang asawa nga gidudahang pulos mga karnaper human sa ginukoray ug giingong nanukol sa mga sakop sa Pardo Police Station diha sa Peace Valley, Sitio Villa Bulsita, Brgy. Bulacao ning Dakbayan sa Sugbo sa nakalabay nga kaadlawon.

Dead on arrival sa Cebu City Medical Center (CCMC) si Artemio “Dindo” Puerto, 45, samtang nadakpan ang iyang asawa nga si Jennelyn Puerto, taga Sitio Black Rubber, Brgy. San Nicolas sa Dakbayan sa Sugbo.

Ang imbestigador sa Homicide Section sa Cebu City Police Office nga si Senior Police Officer 4 Rogelio Cañete nga nahinabi sa Banat News nagkanayon nga samtang nagpatrolya sila si SPO1 Nathaniel Lumacad, PO2 Bomer Garciano ug PO1 Redgie Chan luwan sa patrolcar dihang ilang nakita ang magtiayon nga nagsakay sa usa ka motorsiklo ug wala magsuot og helmet.

Apan sa dihang ilang gisita sa mga polis mipabulhot hinuon sila og padagan hangtod nga nahitabo ang ginukoray gikan sa Pardo Parish Church naabot ang ilang ginukoray sa Peace Valley.

Apan sa pagliko sa eskinita, nawad-an og control sa motor si Artemio maong nangatumba ang duha  apan dali nga mibarog si Artemio ug mikaratil og dagan.

Si PO2 Garciano ug PO1 Chan migukod kaniya apan giingong mibunot og .45 caliber pistol si Artemio hinungdan nga giunhan kini pagpusil  ni Garciano ug naigo sa dughan nga milapos sa likod.

Gidala sa tambalanan si Artemio apan nakabsan gayod kini sa ginhawa.

Sumala pa ni Cañete nga sa dihang iyang gitan-aw ang dala nga bag sa asawa nga si Jennelyn didto nakita ang mga screw driver nga para pang carnap.

Nakuha usab gikan sa asawa ang usa ka kutsilyo nga iyang gitagoan sa iyang hawakan.  Matud pa nga niadtong nakalabay nga tuig gipatawag sa ilang buhatan si Artemio tungod kay gilambigit kini sa pagpangarnap.

Ang mga reklamante matud pa mibutyag nga babaye ug lalaki ang mikuha sa ilang motorsiklo. Apan ang asawa nga nahinabi ni Cañete hugtanon nga mihimakak sa mga pasangil. Matud niini masahista siya ug wala kini naapil sa pagpangarnap. (BANAT NEWS)