Duterte, Poe nag-una na pud sa survey
CEBU, Philippines - Subling nabutang sa unang pwesto sa Social Weather Survey si Davao City Mayor Rodrigo Duterte sa presidential race pinaagi sa 27 percent nga pabor kaniya sumala pa sa report sa Interaksyon.com.
Base kini sa First Quarter 2016 Social Weather Survey nga gihimo sugod sa Marso 30-April 2, 2016. Sunod kaniya si Sen. Grace Poe nga nakakuha og 23 percent, Bise Presidente Jejomar Binay sa iyang 20 percent, Mar "Daang Matuwid" Roxas sa iyang 18 percent, ug Sen. Miriam Defensor Santiago 3 percent, ug aduna say 3 percent nga undecided.
Matud pa nga 7 percent sa mga validated voter-respondents ang naghulog og imbalidong balota.
Samtang sa vice-presidential race nagpakita nga naglawig og maayo ang ratings ni Sen. Bongbong Marcos sa iyang 26%, Chiz Escudero 21%, Leni ''Daang Matuwid'' Robredo 19%, Alan Peter Cayetano 13%, Gringo Honasan 5%, Antonio Trillanes IV 5%, ug adunay undecided nga 6%. Samtang 5 percent ang imbalido og gihulog nga balota.
Apan si Atty. Rico Quicho sa United Nationalist Alliance (UNA) masaligon nga makaabante pa gihapon sila tungod sa nakitang pag-ubos sa lihok sa ratings nila ni Duterte ug Poe sa maong survey.
Ang maong survey gihimo pinaagi sa face-to-face interviews sa 1,500 (18 years old pataas) gikan sa tibuok nasud, 300 sa Metro Manila, North Luzon, South Luzon, Visayas ug Mindanao. (BANAT NEWS)
- Latest