Nakalas sa Basilan wa hatagi og funeral honors?

CEBU, Philippines - Gipadaplin una sa mga pamilya sa mga nakalas nga 18 ka sundalo sa pagpangambus sa teroristang Abu Sayyaf sa Basilan ang matud pa wala paghatag og funeral honors sa militar sa wala pa sila gipadala balik sa ilang mga pamilya.

Sumala pa sa report sa Philstar.com, ang Western Mindanao Command (Wesmincom) mikanselar niadtong Domingo sa public viewing sa Pacquiao-Bradley fight sa gymnasium sa kampo aron butangan sa mga patay’ng lawas sa mga nakalas nga sundalo, apan bisan kini gikanselar pud.

Sumala pa sa maong report, dunay kamandoan gikan sa Department of National Defense ug gikan sa higher headquarters nga di lang una himuon ang funeral honors ug ipadala dayon ngadto balik sa ilang mga pamilya ang mga sundalo.

Si Armed Forces chief Gen. Hernando Iriberri ug Defense Secretary Voltaire Gazmin miduaw sa Wesmincom niadtong Domingo apan walay nasayod kun kinsa nimando pagkanselar sa funeral honors.

Wala usab tugoti ang mga tigbalita pagkuha og videos ug litrato ug interview sa mga taga punerarya nga niandam sa mga patay’ng lawas. Nasayran nga 13 sa mga namatay mga Kristiyano samtang ang lima  Muslim ug gidala na sa mosque sud sa Wesmincom ug gipadala ngadto sa ilang mga pamilya alang sa ilang tradisyonal nga paglubong.

Usa sa mga sundalo ang mikwestyon kun nganong wala daan paulani og bala sa kanyon ang posisyon sa mga kaaway nga unta nasayod naman daan ang AFP kun asa ang mga kalaban. Ang maong mga sundalo padung sa Tipo-Tipo, Basilan alang sa usa ka ‘high-value mission’ apan giambus sila sa gibanabanang 100 ka mga Abu Sayyaf hinungdan sa kamatayon sa 18 ka sundalo ug pagkaangol sa kapin 50 pa nila ka mga kauban.

Sumala pa sa tigpamaba sa Westmincom, Maj. Felimon Tan Jr. nadugangan ang casualties sa ASG, gikan sa lima nahimo na kining 13 ka terorista nga nakalas lakip ang Moroccan bomb instructor ug ang paryente sa ASG leader nga si Isnilon Hapilon.

Matud pa ni Tan ang 4th Special Forces Battalion ug 3rd Scout Ranger Battalion mao karoy nipadayon sa paggukod sa grupo ni Radullan Sahiron ug Furuji Indama.

Way nadugang sa mga nakalas o naangol sa habig sa gobiyerno human sa sunod-sunod nga operasyon sa Tipo-Tipo sukad pa niadtong Domingo. Upat sa 20 ka nasamdang ASG ang namatay. ((BANAT NEWS)