Rally sa 1Cebu-Team Asenso Toledo nahinayon bisan sa pagbangotan

CEBU, Philippines - Malampuson ang proclamation rally sa 1Cebu Party ug paglusad sa Team Asenso Toledo sa plaza sa Barangay Don Andres Soriano (DAS) kagahapon bisan nagbangutan ang pamilya sa kandidato sa pagka-bise mayor nga si Konsehal Ricardo “Kuya Nick” Pepito. Atol sa pakigpulong ni Pepito, una niya’ng gipahibawo sa mga nanambong ang pagkamatay sa iyang 83-anyos nga inahan niadtong Biyernes sa gabii ug ilubong karong Sabado.

Mapupos na ang ikatulong termino ni Pepito isip konsehal hinungdan nga nihangyo kini sa katawhan nga isaka siya og usa ka ang-ang aron makapadayon sa pagtabang sa mga Toledonhon. Mao usab kini ang hangyo ni kanhi mayor Aurelio “Rudy” Espinosa sa iyang tinguha sa pagbalik sa pagka-mayor aron madugangan pa ang mga nahimo niya kaniadto.

Si kanhi bokal Bienvenido Gonzales kinsa magpapili sa samang posisyon ang nangulo sa paghalad og usa ka minuto nga pag-ampo sa kalag sa namatay nga inahan ni Pepito.

Ang kalihukan gitambungan sa mga opisyal ug mga lider sa walo pa lang ka barangay sa Toledo sama sa Loay, Biga, Campo 8, Cantabaco, DAS, Bunga, Poog ug Media Once. Matud ni Espinosa nga gipili nila ang DAS sanglit mao kini ang may labing daghang botante nga barangay.  (BANAT NEWS)