Tulo ka balay sa Mambaling naugdaw sa sunog

CEBU, Philippines - Laing sunog ang niulbo kagahapon sa Bayabas Street, Barangay Mambaling ug niugdaw og tulo ka panimalay ug gibana-bana nga ang kadaot nikantidad og P60 mil.

Matud pa ni Senior Fire Officer-2 Christopher Orbiso nga nadawat nila ang alarma sa sunog 1:48 ug nakontrolar nila ang sunog lima ka minutos human sila nakapasirit       sa tubig.

Sumala pa ni SFO3 Orbiso nga tulo ka panimalay ang hingpit nga naugdaw human nga ang kayo matud pa didto nagsugod sa balay ni Marcelina Bacarisas.

Si Ponciano Patiño nitug-an nga nagsugod ang sunog sa panimalay sa iyang ugangan ug bugtong telebisyon lang ang iyang nadala tungod kay puwerte na kadako ang pagsilaob sa kayo.

Si SPO4 Joel Suello niingon nga duha ka apo ni Bacarisas nga sila si Jovanie ug Jordan Bacarisas ang giimbitar sa mga imbestigador kay adunay nakataho nga usa kanila nagdaob duol sa ilang balay sa wala pa ang sunog. Apan si Jordan Bacarisas nibutyag nga sa ilang pikas kuwarto nagsugod ang sunog. Pipila sa mga lumolupyo niingon nga si Jovanie kanunay kining magdaob duol sa ilang balay.  (BANAT NEWS)