Roxas nag-una sa Visayas sa Pulse Asia Survey

CEBU, Philippines - Nag-una dinhi sa Visayas sa Pulse Asia Survey alang sa pagka-presidente si kanhi Interior Secretary Mar Roxas. Nakita sa uwahing Pulse Asia Survey nga gipagawas niadtong Biyernes nga nakabentaha gyud ang mga kandidato sa mga lugar diin sila nagagikan.

Sumala pa sa report sa Philstar.Com, sa kinatibuk-an, sikit kaayo ang resulta sa uwahing survey sa pagka-presidente sa nasud nga nagpakitang sila Sen. Grace Poe ug Vice President Jejomar Binay “statistically tied” sa unang pwesto.

Samtang sila si kanhi Interior Secretary Mar Roxas ug Davao City Mayor Rodrigo Duterte nagtabla usab sa ikatulong pwesto ug sa ikaupat si Sen. Miriam Defensor Santiago.

Si Poe, nga independente ug si Binay sa United Nationalist Alliance nakakuha og “overall voter preference” nga 26 percent ug 25 percent matag usa.

Samtang sila si Roxas ug  Davao Mayor Rodrigo Duterte nagtabla sa 21 percent. Si Sen. Miriam Defensor Santiago maoy nakakuha og kinagamyang iskor nga 3 percent.

Sa lumba usab sa pagka-bise presidente, sila si  Sen. Francis Escudero ug Sen. Ferdinand "Bongbong" Marcos Jr. “statistically tied” sa unang pwesto.

Si Escudero nakakuha og 29 percent samtang si Marcos 26 percent. Nagsunod kanila si Camarines Sur Rep. Leni Robredo ug ikaupat si Sen. Alan Peter Cayetano sa iyang 19 percent, samtang nagsunod sila si Sen. Antonio Trillanes IV sa iyang 6 percent ug si Sen. Gringo Honasan  4 percent.

Ang maong survey gihimo gikan Pebrero 15 hangtud 20 gikan sa 1,800 ka mga respondents ug aduna kini ±2 margin of error. Ang mga respondents gipangutana kun atol sa pagpangutana kanila mao usab ang adlaw sa piniliay kinsa maoy ilang botaran sa mga kandidatong nahisgutan.

Sa report usab sa Interaksyon.Com, makita sa survey nga si Poe maoy nakakuha og dakong porsiyento sa Luzon  gawas sa Metro Manila pinaagi sa iyang 33 percent,  nisunod si Binay nga 29 percent, dayon si Roxas 19 percent ug Duterte 10 percent samtang 4 percent kang  Santiago.

Nigawas hinuon nga si Binay maoy nakaabante diha sa Metro Manila pinaagi sa 33 percent, sunod si Poe ug Duterte nga parehong 23 percent,  samtang si Roxas 11 percent, Santiago 5 percent. Nanghawod usab si Roxas sa Visayas sa iyang 35 percent, itandi kang Poe nga 24 percent, Binay 20 percent, Duterte 19 percent, ug Santiago 2 percent. Samtang sa Mindanao, si Duterte nakakuha og 45 percent, sunod si Binay nga 21 percent,  ug tabla sa 15 percent sila si Roxas ug Poe ug uno porsiyento kang Santiago.

Ang mga presidential candidates pulos nihangop sa resulta ug adunay nalipay kay nakita nila kun asang dapita sila hinay ug asa sila kinahanglang magdoble og paningkamot.

Ang Liberal Party kansang grupo milusad sa ilang grand rally dinhi sa Sugbo niadtong miaging adlaw pinaagi sa ilang tigpamaba nga si Akbayan Representative Barry Gutierrez,  miingon nga ang survey nagpakita nga sikit gyud ang lumba. Apan base sa dagan sa mga nanglabay nga surveys, nakita nga bisan hinay ang pagsaka ni Roxas wala kini mous-os ug masaligon sila nga kadugayan maabot kini sa unang pwesto.

“Mar's steady rise through the past months gives us firm confidence that we are on track to top the one survey that truly matters, the elections on May 9,” sumala pa niya.

Si Liberal Party senatorial candidate Francis Pangilinan midason usab sa obserbasyon ni Gutierrez.

"This is a very tight race to the finish. Liberal Party presidential candidate Mar Roxas is only five percentage points away from Senator Grace Poe in the latest Pulse Asia survey. This puts Mar in a very good position to catch up, especially with the grassroots machinery and the President on our side," matud pa niya. Aduna pay duha ka bulan aron pangusgan pa sa mga kandidato ang ilang pangampanya. (BANAT NEWS)