Silhig lanot padayong gipalambo
CEBU, Philippines - Padayon nga gipalambo sa mga molupyo sa Paknaan, Dakbayan sa Mandaue ang kabilin nga panginabuhi sa ila’ng katigulangan nga pagpanghimo og silhig nga lanot sa buli.
Si Barangay Kapitan Malaquias Soco niingon nga kini ang hinungdan nga gimugna ang tinuig nga Silhig Festival sa pagpaila sa produkto sa tibuok nasud.
Matud ni Soco nga 15 porsiyento sa mga molupyo sa ila’ng dapit ang nagsalig sa pagpanggama og silhig nga lanot.
Gihangop kaayo nila ang pagpaila sa mao nila’ng produkto ngadto sa ubang kanasuran.
Si Soco niingon nga ang Silhig Festival karong tuiga ang giapilan sa walo ka contingents gikan sa nagkalainlaing sikbit nga barangay sa dakbayan.
Matud ni Soco nga ang una’ng mananaug makadawat og P30,000, ikaduha’ng mananaug P20,000 ug P15, 000 ang ikatulo’ng mananaug. (BANAT NEWS)
- Latest