Gialarma sa armas nasakmitan og shabu
CEBU, Philippines - Gialarma nga armado’ng lalaki sa Dapitan, Lungsod sa Cordova alas 7 pasado sa niagi’ng gabii ang nadakpan sa kapolisan ug nasakmit ang 11 ka pakete’ng shabu ug drug paraphernalia nga gidala niini.
Si Police Officer 3 Vilma Degamo sa Cordova Police Station niila sa nadakpan nga si Raymond Sitoy Pugoy, 27-anyos, minyo nga nagpuyo sa mao’ng dapit.
Matud ni Degamo nga may nitaho kanila labot sa usa ka armado’ng lalaki nga naglingkod daplin sa dalan nga nagluklok og armas.
Ang team sa kapolisan sa lungsod nga gilangkuban nila ni Police Officer 3 Charlie Valmoria ug kaubanan ang dali nga nihimo og pakisusi.
Diha’ng nahidangat na ang mga polis, ang gihulagway nga lalaki nga giingong armado kalit lang nikaratil paingon sulod sa panimalay niini.
Ang kapolisan nakahukom sa paggukod hangtud naapsan sa mga polis sulod sa iya’ng panimalay hinungdan sa pagkasikop apan wala nasakmit ang armas. Sa pagrekisa, nasakmit ang 11 ka gagmay nga pakete sa shabu ug drug paraphernalia nga dala niini. (BANAT NEWS)
- Latest
