CCTO motabang sa TEAM

CEBU, Philippines - Nitanyag og tabang ang Cebu City Transportation Office ngadto sa kagamhanan sa Dakbayan sa Mandaue sa paghapsay sa dagan sa trapiko sa higayon nga hingpit na gyud nga tak-upan ang Mandaue-Mactan Bridge alang sa pag-ayo niini.

Matud ni CCTO operations head, Joy Tumulak, nga nimando si  Mayor Michael Rama sa pagpadala sa ila’ng mga traffic enforcers alang sa pagtabang sa paghapsay sa mga sakyanan sa kadalanan.

Gipasabot ni Tumulak nga gitabangan sa Mandaue ang Dakbayan sa Sugbo sa mga kalihukan sa Sinulog ug sa gihimo nga International Eucharistic Congress (IEC) ug buot nila nga motugbang niini pinaagi sa pagtabang sa pagbutang og mga traffic enforcers nga modumala sa trapiko.

Si Glenn Antigua sa Traffic Enforcement Agency of Mandaue (TEAM) nihangop sa tanyag isip naandan na sa duha ka lokal nga kagamhanan ang pagtinabangay.

Si Engr. Chuck Lopez, project engineer  sa Jegma Construction and Development Corp. nga mao’y kontraktor sa pag-ayo sa taytayan, nipadayag nga dili pa sila makasugod sa trabaho hangtud nga dili pa mabalhin ang linya sa tubig sa Metropolitan Cebu Water District aron paglikay sa masinati nga kadaut niini. (BANAT NEWS)