Gugma sa buta ug pungkol

CEBU, Philippines - Bisan pa man nga pareho sila nga adunay kabilinggan apan nagmalig-onon ang relasyon ug panagpuyo sa duha ka magtiayon sulod sa 20 ka tuig.

Si Domingo Mahusay, usa ka buta, ug si Yolanda Mahusay, usa ka pungkol nga ang gisaligan ang wheel chair sa iya’ng pagpaninda sa eskina Magallanes, Dakbayan sa Sugbo.

Gisaysay ni Yolanda nga nagsugod ang ilang matam-is nga paghinigugmaay niadto’ng usa pa siya ka dealer sa pahumot ug may mga kauban si Domingo nga sige og panungog nila.

Dugang ni Yolanda nga mopasangil og palit og pahumot si Domingo bisan og bag-o pa nakapalit kaniya.

Adlaw-adlaw duawon sa tindahan si Yolanda nga duol usab sa gitrabahoan ni Domingo kaniadto hangtud niabot ang punto nga gisugot ni Yolanda si Domingo.

Apan naglisud og dawat ang pamilya ni Yolanda kang Domingo tungod kay matud pa dili makabuhi gumikan sa iyang kahimtang.

Si Domingo nabuta sa edad nga 7-anyos tungod sa hangga samtang si Yolanda usab may sakit na daan sa bukog sa iyang pagkatawo hangtud   pagkadakin-as napiang ug napungkol.

Sa mga naagian nga pagsuway sa magtiayon sama sa pagkamatay sa ilang bugtong anak kaniadto, malipayon pa gihapon ang magtiayon hangtud karon.

Bisan wala’y igo nga kwarta ang magtiayon, nag-uban kini sila’ng duha nga nagtinabangay sa panginabuhi nga daw sama sa Valentine’s Day ang tanang adlaw kanila. (BANAT NEWS)