Langyaw namaligya’g marijuana sa Malapascua

CEBU, Philippines - Gidakop sa kapolisan ang usa ka langyaw human nga gilabay niini ang dala nga marijuana nga dad-on unta sa Isla sa Malapascua sa Lungsod sa Daanbantayan sa niagi’ng buntag diha’ng gisita sa pantalan sa Maya.

Natanggong sa Daanbantayan Police Station si Wille Marco,48, taga Liechtenstein  nga nanag-iya og resort sa Malapascua.

Matud ni Senior Inspector Roger Quijano, hepe sa Daanbantayan Police Station, nga nakadawat siya og tawag ug text sa ilegal nga kalihukan sa langyaw. Giatngan ni Quijano ug laing tulo ka polis ang bus nga gisakyan sa langyaw ug gisugat dayon kini.

Si Quijano nagpaila ug giingnan niya ang langyaw nga may i-verify siya nga kasayuran apan sa pagkadungog sa suspek ang iya’ng dala nga mga putos iya’ng gilabay.

Sa pagsusi sa kapolisan nasuta nga marijuana ang dala hinungdan nga ila gidakop.

Sumala ni Quijano nga drug-dependent sab ang suspek ug naanad kini og gamit sa marijuana kay legal kini sa iya’ng gigikanan ug gani iya sad ibaligya sa mga customers nga langyaw.

Pasakaan og kaso’ng kalapasan sa Comprehensive Dangerous Drugs Act of 2002 ug sa iya’ng pagdumili ug pagsukol diha’ng gidakop siya sa kapolisan.  (BANAT NEWS)