Nilihay sa motor, titser nalimbuwad
CEBU, Philippines - Gumikan sa paglihay sa motorsiklo, nalimbuwad ang sakyanan nga gimaneho sa usa ka magtutudlo sa South Road Properties sa San Roque, Dakbayan sa Talisay kagahapon sa ala 1:00 sa hapon.
Ang biktima nailhan nga si Sheila Franco, 37, taga Hacienda Milan, Lawaan I, sa mao’ng dakbayan ug magtutudlo sa usa ka daku’ng unibersidad sa Dakbayan sa Sugbo.
Si PO3 Achiles Cabando sa Talisay City Traffic Division nitug-an nga nagmaneho sa sakyanan si Franco paingon sa Siyudad sa Sugbo.
Kalit nga nihunong ang motorsiklo nga iya’ng gisundan hinungdan nga iya kini’ng gilikayan.
Apan sa tanto niya’ng paglikay, nisaka sa center island ang iya’ng SUV ug tungod sa kakusog sa impact nalimbuwad.
Dali nga gitabang si Franco ug gidala sa pribado’ng tambalanan sa Siyudad sa Sugbo.
"Wala man daw siya nakatulog ang iyaha lang nilihay siya sa motor nga nag-una niya pero sa tanto’ng lihay siya naman hinuon ang nadisgrasya," matud ni Cabando. (BANAT NEWS)
- Latest
